Nos Historia
E diagnósis di epilepsia so, no ta sufisiente.
Ta esensial pa e persona ku ser konfrontá ku epilepsia haña atenshon tambe pa e efektonan sikososial ku epilepsia ta trese kuné.
Yuda nos hasi un diferensia.
Stichting Epilepsia Curaçao Naïria Winklaar ta invitá bo pa bira nos embahador i yuda nos plama konosementu i konsientisashon tokante epilepsia/djimpi rònt Kòrsou.
Kurason di Stichting Epilepsie Curaçao Naïria Winklaar ta konta ku un storia fuerte i emoshonal, un storia di amor di un mama, pèrdida, i determinashon pa hasi un diferensia.
Bida di Bruna a kambia kompleto ora ku su promé yu resien nasi, bunita i vibrante, Naïria, a wòrdu diagnostiká ku epilepsia. Manera kualke mama, Bruna a sinti su mes desesperá i desampará den e mundu kompleho di kuido pa epilepsia. Nunka promé Bruna no a yega di tende di epilepsia. Sporádikamente Bruna a yega di tende di djimpi. Pero djimpi tabata pa Bruna algu kompletamente otro for di lokual e ta mira serka su yu.
Miéntras Naïria tabata lucha balentemente kontra e retonan ku epilepsia a trese den su bida, Bruna a bira su defensor mas ferviente. Huntu nan a enfrentá hopi bishitanan na hòspital, pasa dor di e diferente pruebanan tambe pruebanan ku medikamentu, emoshonnan i tambe desesperashon. Den tur esaki, Bruna tabata deseá pa por tabatin un persona ku por a yud’é prinsipalmente komprondé kiko ta pasando ku su yu, sa dikon su yu a haña epilepsia, yud’e haña kontesta pa e avalancha di preguntanan ku ta keda drai den su kabes.
Lamentablemente Naïria su lucha kontra epilepsia a kaba demasiado tempran dor di SUDEP ( Sudden Unexpected Death in Epilepsy).
Fayesimentu di Naïria a laga su Mama ku un kurason kibrá pero determiná pa duna honor na su yu su memoria.
