Nos Focus
Stichting Epilepsie Curacao Nairia Winklaar su focus ta riba e parti sikososial ku e personanan ku ser konfrontá ku epilepsia tin ku karga kuné.
Dikon Stichting Epilepsie Curacao Nairia Winklaar ta focus riba e parti sikososial?
Despues ku un persona sali dòkter/spesialista i e haña e diagnóstiko epilepsia pa su mes òf un famia, probablemente e ta haña resèpt pa traha remedi, sita pa hasi pruebanan i sita pa e próksimo biaha ku e tin ku bishitá dòkter.
Despues e pregunta (nan) ta bin……..
- Kon mi ta bai sigui ku mi bida….kon mi ta bai sigui ku e bida ku epilepsia.
- Mi tin miedu pa haña un atake atrobe! E miedu aki ta dominá mi bida.
- Mi tin miedu pa e yu no haña un atake na skol e por kai lastimá su mes.
- Kon mi ta hasi krea un balansa pa mi yu sigui ta un mucha i hasi su kosnan di mucha normal i protegé ora e haña un atake epileptiko/djimpi?
- Kiko e personanan lo bisa si mi haña un atake na trabou?
- Mi por laga e yu sigui bai skol?
- Mi por lag’é drumi su so?
Stichting su meta ta pa empoderá e personanan ku ser konfrontá ku epilepsia ku informashon relevante, konosementu i e guia nesesario,pa asina nan por tin e maneho di nan bida ku epilepsia den nan man i krea e oportunidat ku nan por partisipá den nos komunidat meskos ku tur otro persona.
Kiko ta un inkietut sikososial?
Inkietut Sikososial ta un kombinashon di inkietut sikológiko ku tin di haber ku bo sintimentu i pensamentu i e parti sosial ku tin di aber ku bo relashon ku otro persona (nan) òf instansia (nan).
Inkietutnan sikososial por okashoná doló di kabes, batimentu di kurason ,por buta ku un persona ta drumi malu, e por kousa depreshon i buta personanan yega na pensamentunan suisidal. Personanan ta eksperensiá e problemanan sikososial hopi bes mas pisá ku e atake epiléptiko/djimpi mes
