About Epilepsy
Konsekuensianan Sikososial di un atake epiléptiko/djimpi
Mas pisá ku e konsekuensianan físiko di tin epilepsia i haña atakenan epiléptiko/djimpi, ta e efektonan sikososial. Kada persona ta eksperensiá e efektonan sikososial otro.
Por ehèmpel, un persona ku epilepsia por risibí reakshonnan negativo i eksperensi’é komo falta di sosten for di nan ambiente. Otro persona por nota ku problemanan di memoria ta forma un opstákulo na trabou.
Algun problema sikososial ku hende ku epilepsia por eksperensiá ta:
Sentimentu di dependensia
- Dependiendo di e tipo i kantidat di atakenan, hende ku epilepsia ta haña nan ta mas dependiente di otro hende. Esaki por sosodé, por ehèmpel, pasobra ora ainda bo tin atakenan epiléptiko, bo no ta permití pa kore outo òf bai landa bo so.
- Dor ku e persona ta haña atakenan nokturno, semper tin un persona ta keda pendiente di dje ora e ta drumiendo.
Konfiansa propio ta baha i ta sinti ansha
- Spesialmente e karakter repentino i hopi biaha inesperá di un atake epiléptiko/djimpi ta buta bo ansha, den tenshon i hopi biaha sinti bèrgwensa.
Lo mi haña un atake atrobe? Na kual momento? I kiko lo ta e konsekuensianan? Kiko e personanan lo pensa i kiko nan lo bisa?
Preguntanan manera esaki por afektá un persona su konfiansa propio. P’esei, pa evitá un atake den publiko, hende ku epilepsia tin biaha ta evitá aktividatnan spesífiko. Algun hende, por ehèmpel, no ta tin kurashi di manehá outo, aunke nan tin e atakenan bou di kontrol. Tambe, hende por evitá hunga den awa òf redusí aktividatnan seksual dor di miedu pa un atake. Sinembargo, no ta konosí ku sèks por kousa un atake. Sinembargo, e deseo seksual por disminuí dor di e medikamentunan kontra epilepsia.
Depreshon
Esaki ta relashoná ku e konfiansa propio ku ta baha, ansiedat i hopi biaha e aislamentu. Investigashonnan sientífiko ta mustra ku hende ku epilepsia ta wòrdu konfrontá mas frekuentemente ku síntomanan di depreshon.
Difikultat ku konsentrashon por dura algun biaha dia(nan)
Esaki por tin un impakto grandi riba e manera di funshoná diario, trabou i relashonnan di hende.
Lubidamentu
Por ta ku e persona ta nota ku e ta lubidá mas lihé ku promé i ta nota ku otro por retené mihó. Problemanan di memoria por surgi despues di un atake – bo tin e impreshon so di kosnan ku a sosodé promé di e atake – òf por ta mas permanente. Algun hende por tin difikultat ku retené kosnan mané lista di kompra, konta kuenta, i kòrda kumpleañonan.